Linggo, Oktubre 9, 2011

BALAGTASAN


PAARALANG ELEMENTARYA NG SAN ROQUE
                                               
PIYESA PARA SA PATIMPALAK NA BALAGTASAN

Tema ng Buwan ng Wika:     “Ang Filipino, Wikang Panlahat,
Ilaw at Lakas sa Tuwid na Landas”

Paksang Pagtatalunan:         Alin ang nararapat na maging Wikang Panlahat,
                                                Wikang Filipino ba o ang ating Lingua Franca?

Isinulat ni:   Mrs. Ucille P. Galvez
______________________________________

Lakandiwa:               Ako’y isang Lakandiwang nagbuhat pa sa San Roque
sa  Paaralang Elementarya na ‘king tinatangi,
at  ngayon ay boung galang na sa inyo’y bumabati
at umaasang nawa ang paksa ay mapaglilimi
Upang patimpalak na balagtasan ay magwawagi.

Paksang aking ilalatag, pakiwari’y mahalaga
Dahil ang  pagtatalunan ng ating mga  makata
Ay kung anong wika ba ang magiging wikang panlahat
Filipino ba na pambansang wika at kilala pa
O  lingua franca na sa pagkabata’y nasa labi na.

Kaya’t itong Lakandiwa sa inyo’y nag-aanyaya
Ng dalawang mambibigkas na mahusay at kilala
Upang pagtalunan ang paksang aking itinalaga.
Ang hiling ko lamang ay palakpakan silang dalawa
Panig nilang ihaharap ay suriin at magpasya.

Wikang Filipino:       Ako ay isang batang kay Manuel Quezon nagpupuri
                                    Naniniwalang, Wikang Filipino ang  minimithi
                                    Upang bawat Pilipino ay magkakaisa lagi
                                    Lahat ng hangarin ng mga damdaming sumisidhi.

Lingua Franca:         Ang iyong lingkod ngayon ay nagmula pa sa malayo
                                    Sa Balagtasang ito, magiliw akong sumasamo
                                    Gamit na wikang nagmula sa kinagisnang ninuno
                                    Aking ipaglalaban upang ating isasapuso

Lakandiwa:               Atin nang natunghayan mga makatang maglalaban
                                    Nagmula pa sa bayang kanilang kinabibilangan
                                    Ang isa’y nagmula pa sa pulo ng  Kabisayaan
                                    Itong magandang dalaga’y   sa Katagalugan naman.
                                   
Wikang Filipino:       Sa ating Wikang Filipino ako ay nagpupugay
                                    Wikang ginagamit sa Luzon, Visayas at Mindanao
                                    Kaya kilala ng lahat, ginagamit araw-araw
                                    Kahit saan ka magpunta, siya’y magsisilbing tanglaw.

                                    Wikang Filipino, narapat maging wikang panlahat
                                    Ito’y  pamana ni Pangulong Quezon para sa lahat
                                    Samantalang lingua franca sa pagkakaisa’y salat
Sa malalayong probinsya lamang ito nararapat.



Lingua Franca:         Dahan-dahan sa pagsalita katunggaling maganda
                                    Sapagkat nasasaktan mo mga taong maralita
                                    Sariling wika’y ‘di tumututukoy sa wikang pambansa
                                    Kundi sa wikang nakagisnan at laging nasa baba.

                                    Lingua Franka ay nararapat na hindi kalimutan
                                    Ito’y salamin ng kultura ng bawat lalawigan.
                                    Sa likod nito’y paniniwala ng ‘ting kababayan
                                    Sa Lingua Franka, tuwid na landas  ang magiging daan.

Wikang Filipino:       Nagkamali ka sa iyong paniwala katunggali ko
Ang sariling wika natin ay ang  Wikang Filipino
Surian ng Wikang Pambansa pa ang nagbuo nito
Upang magkakaintindihan lahat ng Pilipino.

Ang lingua franca ay hindi ko naman minamaliit
Ito’y atin na mula  noong  tayo’y isa pang paslit.
                                    Ngunit iilang tao lamang ang dito’y gumagamit
                                    ‘Di tulad ng Filipino, gamit kahit nakapikit.

                                    Filipino ang nararapat na maging wikang panlahat
                                    Sa kalakalan,  sa paaralan at maging sa simbahan
                                    Kahit sa pagbabalita, hindi mo ba nakikita
                                    Kapag Filipino ang gamit hindi ka matutunganga.

                                    Matuwid na landas, handog ng Wikang Filipino
                                    Gamit ng mga guro bilang kanilang wikang panturo
                                    Sa  simbahan man upang sa wastong aral ay matuto
                                    Sa  pamahalaan man upang batas ay mabubuo.

Lingua Franca:         Paano magiging panlahat ang wikang Filipino
                                    Kung ang  tao ay gumagamit ng mga dayalekto
                                    Lumibot ka sa ‘ting pitong libo’t isang daang pulo
                                    Mapapatunayan mo na sinasabi ko’y totoo.

                                    Sa paaralan, guro nga’y nagturo ng Filipino
                                    Ngunit isinasalin pa rin sa mga dayalekto.
                                    Sa paggawa ng batas, di ba Ingles din katuto ko?
                                    ‘Di mo masasalin ang Konstitusyon sa Filipino.

                                    Sa simbahan, gamit ng pari ay dayalekto
                                    Dahil kung hindi, mga tao ay tutunganga rito
                                    Kaya lingua franca, wikang panlahat ng mga tao
                                    Daan sa matuwid na landas ng mga Pilipino.

Lakandiwa:               Sadyang ang ating baya’y puno ng salinlahi
                                    Saan mang sulok may nagkakaisa’t may minimithi
                                    Gamit na wikang natutunan sa labi namutawi
                                    Ito’y pinapahalagahan at hindi winawaksi.

                                    Ang Lingua Franca’y simbolo sa mayaman nating lahi
                                    Lahing Pilipino’y laging angat sa anumang lipi
                                    Mga dayalekto hayaang mamutawi sa labi
                                    Ating salinlahi dapat ay ating ipagbubunyi.

                                    Bagamat ganun man, ating bansa’y nangangailangan
                                    Isang wikang pambansa na ating magiging sandigan
                                    Wikang daan tungo sa ating pagkakaintindihan
                                    At pambansang pagkakakilanlan kahit saan ka man.

                                    Wikang Filipino, ang siyang ating wikang pambansa
                                    Nararapat tangkilikin at dapat na idambana
                                    Ito’y magbubuklod sa mga dayalekto ng bansa
                                    Upang tayo’y magkaisa sa puso, isip at diwa.

                                    Ngayong napakinggan na natin ang dalawang makata
                                    Malalaman na ninyo ang hatol ng lingkod nyong aba
                                    Ang kanilang napiling wika kapwa ay mahalaga
                                    Maging Filipino man ang gamit o ang lingua franca
                                    Gamit sa kaunlaran ng ating bansang sinisinta.

                                   

Walang mga komento:

Mag-post ng isang Komento